هل اخبره بالحقيقه الآن?
ابلغ من العمر37عاما اتزوجت قبل سنوات وانجبنت طفلين وحاليا اعمل في ماليزيا
وفي احدي زيارتنا للسودان حضرت مناسبه في دور رعاية الاطفال مجهولي النسب فتأثرت لحاتهم فقررت انا وزوجتي ان نتبنى طفل وقد كان التبني وكان احلا طفل وعمره متقارب لاعمار اطفالنا
واحببته وتلقت به وكذلك زوجتي لانه كان فعلا طفل رائع بمعني العبارة.
وادخلنا افضل رياض الاطفال في ماليزيا ومن ثم تمرحل للاساس مع اخوته بنفس النهج
المهم من ناحية تربية مامقصرين فيه خالص
بقت المشكله هل نخبره الان ام ننتظر حتي يكبر?
افيدوني وثوابكم علي الله?
.
.
.
.
.
.
.
لك التحية الكريم واحييك علي مشاعرك النبيله والانسانية تجاه هؤلاء الاطفال.
طبعا لازم يعرف وامر حتمي لان الدين يحكمنا نخبره عن نفسه.
الامثل انك تبدا تخبره بالحقيقه تدريجيا من عمر 6 سنه كآن تقصص عليه قصص تشبه حالتو باستمرار الغاية منها نلفت انتباه حتي نجهزه للحظة الصفر والاخبار بالحقيقه .
فلابد ان تجهزو نفسيا لتقبل الخبر
انا حاديك مثال لحالة من نفس النوع كيف كانت لحظة الاخبار الاخيرة انت اقتبس منها المناسب.
تصوغو بقصة مناسبة تخبره بها
نتوقع منه الاندهاش والالم لكن بكون اقل وبعد فترة حيتقبل الحقيقة
وليك مقطع عن لحظة الاخبار
(المهم بعد جات نور من المدرسة .. وارتاحت شوية واتغدت ناداها .ابوها. تعالي يانور ياحبيبتي انا عايزك .. قالت ليهو حاضر يا بابا..
قال ليها .. اناعايزك في موضوع ضروري ..
جات وقفت قدامو ..وقلعت سفنجتها اللابساها.. .. اها يابابا.. قول .. !! .انا ح انتبه لكلامك شديد.. وبقت تغمض وتفتح في عيونها وتتبسم..!
محمد قلبو وجعوا . وبلع ريقو .. وقرررب يضعف .. وكوثر قاعدة جوة في الاوضة ..متمحنة وتعاين ليهو..
محمد قوى قلبو ، واتنحنح وقال ليها .. انا عايز اسالك سؤال يانور ..
قالت ليهو اسألني يابابا.. انا بحل اي سؤال ح تشووووف.. قول بس انت ..
قاليها طيب.. من هو النبى الذي اتربى في بيت ما بيت اهلو . والناس الربوهو ماعارفين اهلو .ولاعارفين امو ولا ابوهو ..
وكانو بسموهو اللقيط؟
قالت ليهو ايوه عارفة يا بابا .. ده سيدنا موسى . لمن فرعون قال عايز يضبح الاطفال..
سيدنا موسى امو ختتو في تابوت من الخشب.. ونزلته كدا برااااحة في البحر ..
قال ليها عليك نووووووووور يانور .. انتي بت شطورة ..
يلا يانور انتي زي موسى ده بالضبط .. قالت ليهو كيف يعني؟؟ !! .. انا رسولة؟
قال ليها لا .. يعني نحن لقيناك وماعارفين امك وابوك .. قعدت تضحك وقالت ليهو .. هوي يا بابا . كيف يعني ؟؟ انتو امي وابوي وماعافرين نفسكم؟
قال ليها يانور انا قاعد اكذب ؟؟ قالت ليهو لالالا .. ابوي انا مابكذب.. وبكره الكذب كمان.. عشان الكذب حرام.
قال ليها يلا يانور اسمعيني كويس .. انا وكوثر لقيناك في حتة وماعارفين امك وابوك منو؟
وكوثر دي امك الربتك لكن ماولدتك ..
قالت ليهو يعني لقيتوني في تابوت في البحر برضو ؟))
..............وهكذا
بعده تقوم تحضنو عليك مثلاوتحسسو انك محتتخلي عنه كنوع من تخفيف الصدمة
وتمارس عليه تقوس الحب والحنان والاحتوا. بعد الاخبار .
نتمني التوفيق لك